Běła Woda (AK/SN). Janska kupjel w Běłej Wodźe přeńdźe do priwatneho nošerstwa. Tole je měšćanska rada na swojim zašłym posedźenju jednohłósnje wobzamknyła. Kupjel nawjeduje přichodnje gastronom Steffen Laube. Rodźeny Choćebužan skutkowaše dołhi čas w Berlinje a bydli nětko w Krušwicy. Jeho koncept předwidźi, zhromadnje z kupjelu tež lodowu kofejownju wobhospodarjeć. Nimo kofeja a lodu chce tam tež pizzu předawać. Dźěćace narodniny, kinowe předstajenja pod hołym njebjom a koncerty chcedźa tam tohorunja wotměwać.

Steffen Laube chce kupjel takrjec jako pospyt najprjedy wot 1. junija hač do kónca lěta nawjedować a hakle potom zasadny koncept wobhospodarjenja předpołožić. Wot 1. julija hač do 31. awgusta budźe kupanje móžne. Město Běła Woda připłaći jako přiražku maksimalnje 15 000 eurow. „Tajka atrakcija kaž kupjel wosrjedź města dyrbjała komunje tule sumu pjenjez hódna być. Kupjel je tež za turistow atraktiwna“, praji nowy wobhospodar Janskeje kupjele.