Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym ­pčołkam a pčołarjam wěnujemy. (6)

72lětny Ekkehard Hübner njeje jenož wuspěšny pčołar, ale tež wuběrny znajer stawiznow stolětneho Njeswačanskeho towarstwa pčołarjow „Nad Čornicu“. Zajim za pčołarstwo w nim zbudźił je jeho nan, kiž bě w 1950tych lětach na wopyće pola znateho. Tón hižo wjele lět pčołki plahowaše. Wot njeho je Njeswačan dóstał jedyn lud, kotryž je sej w papjercowym kartonje domoj wzał. Bórze po tym měješe na zahrodźe hižo dźesać ludow a často bě Ekkehard Hübner swojemu nanej spušćomny pomocnik. Jako wón 1965 10. lětnik wuspěšnje zakónči, nawukny we Wětrowskej šamotowni powołanje zamkarja. Jako tajki je tam hač do wuměnkarskeje staroby dźěłał.