Budyšin (SN/MWj). Stajnje druhu njedźelu septembra wotměje so po wšěm kraju dźeń wotewrjeneho pomnika. Sobu najwjace zajimawostkow w Hornjej Łužicy skića město Budyšin. Tu móža sej zajimcy wot 10 do 17 hodź. dohromady 27 objektow wobhladać, mjez druhim twarjenje na Hłownym torhošću 8, staru rolu na Schillowej, jastwo a Małowjelkowske sotrowske domy. Na Tuchorskim kěrchowje poskićuja wodźenja a rozprawjeja wo saněrowanju rownišćow. Tež Budyski Serbski dom je cyły dźeń přistupny. W 11 a w 13 hodź. powjedźe Jurij Łušćanski zajimcow po domje a pokaza jim zajimawostki twarjenja. Serbska kulturna in­formacija je na tym dnju wotewrjena. W Smochčanskim kubłanišću swjateho Bena móža so hosćo w 14 hodź. na wodźenjomaj wobdźělić. Jónu powjedu wopytowarjow po parku, tamne wodźenje zaběra so ze stawiznami twarjenjow. W 15 hodź. započnje so na zahrodźe koncert. Jón wuhotuja Wojerowski komorny chór, Šěrachowski cyrkwinski chór a skupina Wólbernosće.