Štyri modlerske stołpy w Kulowskej wosadźe wonječesćene

Kulow (AK/SN). Za nadběh na žiwu křesćansku wěru maja potrjecheni wonječesćenje štyrjoch modlerskich stołpow blisko Salowa a delnich Sulšec. „Što ludźi k tomu pohnuwa – wotpohladnje – swójstwo cuzych zničić, za to słowa nimam. Wospjetne zničenje swjatych křižow, a to w tajkim rozměru, je drama“, měni ­Gabriš Nawka, farar Kulowskeje wosady Swj. Marije donjebjeswzaća, z widom na bywše tajke njelubozne podawki.

Měšćanski radźićel Georg Szczepanski (CDU) ze Salowa, wot lěta 2011 zastupowacy měšćanosta Kulowa, je na minjenym posedźenju měšćanskeje rady wo zničenjach informował. Wone stachu so w nocy wot 21. na 22. winowc. „Jako radźićel sym wozjewjenje přećiwo njeznatym zapodał. Policija přepytuje“, rjekny wón.