Budyski wokrjes chce Sprjewiny hotel dale za požadarjow azyla wužiwać
Budyšin (SN). Kak po zapalerstwje w Sprjewinym hotelu w Budyšinje nastupajo zaměstnjenje ćěkancow nětko dale póńdźe? Prašenje to, wo kotrymž je krajny rada Udo Wićaz (CDU) we wobłuku wurjadneho posedźenja Budyskeho wokrjesneho sejmika předwčerawšim w sprjewinym měsće informował.
Pozdatny zapalerski nadpad na planowany kwartěr je wužadanja krajnoradneho zarjada Budyšin nastupajo zaměstnjenje požadarjow azyla hišće raz přiwótřił. Wokrjes pak při tym wostanje, bywši hotel jako kwartěr wužiwać chcyć. Dokelž dyrbja najprjedy škody wotstronić, so planowane terminy za wužiwanje přesunu.
