Minakał (CS/SN). Je wjele starych rjemjeslniskich powołanjow, kotrež hroža wotemrěć. Jedne z nich je kobjeler. Thomas Scheffel z Minakała so za to angažuje, zo by so tele powołanje zachowało. A to čini wón hižo jara dołho. Njedawnu třeću adwentnu njedźelu je swój 30lětny zawodowy jubilej swjećił. Wosebje wjeselił je so nad tym, zo je jemu Radworska wjesnjanostka Madeleine Rentsch, kotraž w Minakale bydli, tón dźeń jako prěnja gratulowała. Hromadźe z kupcami a přećelemi Thomas Scheffel při šalce horceho wina na zašłych 30 lět zhladowaše.

Po tym zo bě Minakałčan 1991 mištersku šulu wotzamknył, zwaži so lěto pozdźišo do samostatnosće. Zdźěla dyrbješe jara ćežke časy přetrać. Zmištrował to je, dokelž móžeše so stajnje na podpěru přećelow spušćeć. Tónle přećelski kruh hač do dźensnišeho wobsteji. Ideju, kobjelerstwo nawuknyć, je Thomas Scheffel tohodla zrodźił, dokelž jeho nan jako ­hajnik wot 1960tych lět witki za wšelakich kobjelerjow plahowaše. Syn to hač do dźensnišeho čini, ale za swójsku po­trjebu. Přiwšěm wón w nalěću witkowe sadźenki předawa. Te rozpósćele wón hač do Šotiskeje.