Dwě wobzamknjeni steještej na dnjowym porjedźe wčerawšeho posedźenja Budyskeje měšćanskeje rady. A to nastupajo podźěl města na financowanju NSLDź kaž tež za wólby přisydnikow.

Budyšin CS/SN). Podźěl města Budyšina na financowanju Němsko-Serbskeho ludoweho dźiwadła (NSLDź) bě jedna z hłownych temow na wčerawšim posedźenju Budyskeje měšćanskeje rady. Na jeho čłonow intendant NSLDź Lutz Hillmann apelowaše, z Budyskim wokrjesom wujednanemu kompromisej wo podźělu města za dźiwadło přihłosować. Hillmann argumentowaše, zo 1796 załožene dźiwadło swoju najwjetšu skutkownosć w Budyšinje samym wuwiwa. Nimo toho je podźěl města wot lěta 2013 konstantny. „Problematika je kompleksna. Přiběraca pjenježna podpěra za dźiwadło njeje jenož zwyšenych tarifow dla trěbna“, Hillmann rjekny. Wón tohodla namjetowaše, čłonow měšćanskeje rady jako frakcije abo w cyłku do dźiwadła přeprosyć, zo móhli so dokładnišo informować. Wyši měšćanosta Karsten Vogt (CDU) připowědźi, zo chcedźa poskitk w přiradźe staršich pruwować a potom rady přiwzać.