Jako rěkaše spočatk meje „Pytamy Waše foto!“, njedachu so čitarki a čitarjo Serbskich Nowin dołho prosyć a připósłachu pilnje swoje motiwy wo lětušim mejemjetanju. Na wšěch 63 motiwow wot dźesać wšelakorych fotografowkow a fotografow dóńdźe hač do kónca meje do redakcije. Wšitkim pilnym fotografam so na tutym městnje z wutroby za jich zmužitosć a zwólniwosć dźakujemy – wšako njeje samozrozumliwe, swoje fota k wozjewjenju zapósłać.

Najwšelakoriše fota w najwšelakorišich kwalitach z najwšelakorišimi tematikami – čitarki a čitarjo pokazachu wšitcy swój talent za kameru. Najćeši nadawk wězo bě, najrjeńše motiwy wuzwolić a tute mytować. Redakcija pak so tutoho nadawka bojała njeje a tak móžemy Wam, lube čitarki a lubi čitarjo, dźensa najrjeńše fota wo łužiskim mejemjetanju 2023 wozjewić. Za přichod sej přejemy, zo budźe jadro woblubowaneho ludoweho nałožka zaso husćišo zwobraznjene.