Korzym (CS/SN). Budyski wokrjes přisłuša nětko zaměrowemu zwjazkej Korzymskeje kupjele. Wotpowědne zrěčenje staj krajny rada Udo Wićaz (CDU) a předsyda zaměroweho zwjazka Sven Gabriel předwčerawšim w kupjeli podpisałoj. Z tym přewozmje wokrjes 51 procentow podźěla zwjazka. Tamne dźěla sej Šěrachow-Korzym, Załom, Hornja Hórka a Beiersdorf w Zhorjelskim wokrjesu.

Z tym drje stej přichod Korzymskeje kupjele a jeje planowane saněrowanje zawěsćenej. Spočatk tohole měsaca su próstwu wo spěchowanje Sakskej krajnej direkciji zapodali. Jeli dóstanu spěchowanske srědki přizwolene – a z toho wšitcy wobdźěleni wuchadźeja – móhli srjedź lěta 2024 twarić započeć. Hdyž tuchwilu planowany twarski čas 18 měsacow dodźerža, móhli so zajimcy wot nazymy 2025 w Korzymju zaso kupać. Mjez druhim chcedźa kupjel energetisce saněrować a jeje tepjenje wot płuna na drjewjane třěški přestajić. Dale ma so technika w kupjeli ponowić a dźěćacy wobłuk kaž tež sawny chcedźa powjetšić. Za to je 23 milionow eurow planowanych.