Nuknica (SN/MWj). Kapałka w Nuknicy, kotraž je ze stareje wohnjowoborneje gratownje nastała, je wot wčerawšeho takrjec wo wažny dźěl wudospołnjena. W přitomnosći mnohich wjesnjanow a wosadnych je Chróšćanski farar Měrćin Deleńk před kapałku nowu zwóńcu poswjećił. Nyšpor na patronatnym swjedźenju swjateho Antoniusa, kotremuž je kapałka poswjećena, wobrubichu Chróšćanscy dujerjo a šola Nukničanskich dźěći.

Zwóńcu natwarichu z čestnohamtskimi pomocnikami ze wsy a z cyłeje wosady. Wona wobsteji ze štyrjoch wysokich hrjadow z larika, kotrež dóstachu Nukničenjo darjene. Železny horni dźěl, do kotrehož je zwón powěsnjeny, je kowar Pěčka twarił. Drjewjane hrjady a železny horni dźěl Nukničenjo a dalši mužojo hromadźe zestajichu a wutoru do swjedźenja Božeho ćěła před kapałku nastajichu. Zwóńca je nimale pjeć metrow wysoka a 50 centimetrow šěroka. Zwón pochadźa z Mnichowa. Jón su minjeny pjatk instalowali. Nětko móže wón k zhromadnym modlenjam a k druhim składnosćam zwonić.