1 800 ćěkancow je tuchwilu w Budyskim wokrjesu zaměstnjenych. 270 z nich je hižo připóznatych. Woni pak na přiběrajcy ćežkich imobilijowych wikach žane bydlenje njenamakaja.

Budyšin (SN/at). Dołhi čas faworizowana warianta za zaměstnjenje ćěkancow w Budyskim wokrjesu běchu centralne zhromadne kwartěry. Tele postupowanje bu předewšěm loni nazymu kontrowersnje diskutowane a wjercholeše we wotpokazanju najimanja imobilije za zhromadny přebytk we Wojerecach přez wjetšinu wokrjesnych radźićelow a radźićelkow na posedźenju wokrjesneho sejmika loni w decembrje. We wuslědku toho je krajny rada Udo Wićaz (CDU) krótko po posedźenju nadawk dał, nowu koncepciju zaměstnjenja zdźěłać.