Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje ­čitarjam do domu noša. Najwjetši čas tuž našich pilnych roznošowarjow w lětnjej seriji předstajić (2).

Jako swjećachu Salowčenjo krótko do towaršnostneho přewróta 1989 swoju 725. róčnicu prěnjeho pisomneho naspomnjenja swojeje wsy, drje njebě nikomu wědome, zo so bórze tež za nich njewočakowane změny stanu. Nic jenož zo bu 1994 Salow do Kulowa zagmejnowany, ale dóńdźe tež wjele dalšim změnam, kotrež so na wjes wuskutkowachu. Tak bu tam hižo kónc lěta 1991 póšta zawrjena. Wo wšě trěbne nadawki bě so tam 27 lět Lejna Nukowa swěru starała.