Trjebin (JoS/SN). Sakski cup 2023 we wohnjowobornym sporće je so minjenu sobotu w Trjebinje wotměł. Za organizowanje wulkeho podawka su tamniši wobornicy wjele chwalby žnjeli, dokelž běštej městnosć a technika runje tak derje přihotowanej kaž zastaranje, zwukowa technika a wšitko dalše. Wobdźěliło je so 18 mustwow ze 180 wobdźělnikami. Mjez nimi bě 40 młodostnych w starobje pod 16 lětami. Dale je so 70 organizatorow wo bjezporočny wotběh wubědźowanjow postarało.
Najwjetše wužadanje w přihotach bě twar wjace hač 15 metrow wysokeje wěže, štož wotpowěduje něhdźe třiposchodowemu twarjenju. Natwariła je ju Hamorska firma, kotraž měješe dokładne měry pjeć króć wosom króć 15,50 metrow dodźeržeć.
