Zazběh sobotnišeho festiwalneho wječora na farskim dworje běše fulminantny: pod přewodom chóra a hudźbnikow na tradicionelnych instrumentach, su rejowarjo słowakskeho folklorneho ansambla Gymnik w razantnej reji – wotměnjejo w kole a w porje – publikum wot prěnjeho wokomika sobu storhnyli. Napadny element běše teptany rytmus rejowarkow a rejowarjow – wšitcy w škórnjach. Z jara wobšěrnym a wotměnjawym programom přeswědčištej Serbski folklorny ansambl Wudwor hromadźe ze spěwarjemi Přezpólnych. Wosebity wjeršk běše zawěsće „tykancowa reja“ z blachami połneho najlěpšeho pjekarskeho tykanca, kotryž rejowarjo po předstajenju mjez přihladowarjemi rozdźělichu. Tak kaž běše mo­derator wječora Franciskus Wornar při­powědźił, katalanska folklorna skupina S’Eixam Mallorquí z dowoloweje kupy Mallorci ze swojimi „burskimi rejemi połnych emocijow a intuitiwnych elementow“ wšitkich přihladowarjow zakuzła. Podźěl na tym mějachu zawěsće tež kastagnety, z kotrymiž rejowarjo swoje reje rytmisce přewodźowachu.