Zły Komorow/Budyšin (SN/MiP). Serbska trikolora zmawowaše so tydźenja štwórtk před wokrjesnym zarjadnistwom wokrjesa Hornje Błóta-Łužica w Złym Komorowje. Tudyša społnomócnjena za serbske naležnosće Hanka Rjelcyna běše na konferencu Braniborskich hłownohamtskich zamołwitych za serbske naležnosće přeprosyła. Nimo wšitkich zastupjerjow serbskich wokrjesow kaž tež města Choćebuz běštaj tež krajny rada Siegurd Heinze (njestronjan) a statny sekretar za wědomosć a kulturu Tobias Dünow (SPD) přišłoj. Dünow je zdobom tež zamołwity za serbske naležnosće kraja Braniborskeje. „Dźěło serbskich społnomócnjenych je nic jenož hladajo na praktiske prašenja mjeńšinoweho škita na městnje jara wažne, wone tež mócnje k tomu přinošuje, zo je hłós Serbow w Braniborskej dźensa prezentniši hač hdy prjedy“, wón na zarjadowanju wuzběhny.