Zapřimnjenje kraja do komunalneho samozarjadnistwa serbskich naležnosćow dla je w Braniborskej móžne. To je hłowne dopóznaće po wčerawšim jednanju na Choćebuskim zarjadniskim sudnistwje.
Choćebuz (SN/at). Gmejna Stara Niwa-Wózwjerch (Alt Zauche-Wußwerk, wokrjes Dubja-Błóta) bě přećiwo ministerstwu za wědomosć, slědźenje a kulturu kraja Braniborskeje skoržiła. Te bě z nowelěrowanjom braniborskeho Serbskeho zakonja 2014 komuny namjetowało, kotrež bychu po rešeršach serbskich slědow dla do sydlenskeho ruma słušeli. Gmejna Stara Niwa-Wózwjerch je wotpowědne zdźělenje 2017 dóstała a so, powołujo na prawo komunalneho samozarjadnistwa, přećiwo tomu juristisce wobarała. Pad je jedyn z dohromady dźesać.
