Njebjelčicy (SN/MWj). Cyle w znamjenju swjatych křižow, modlerskich stołpow a dalšich zjawnych swědkow nabožneje zwjazanosće ludźi w serbsko-katolskej kónčinje steješe sobotu druha kolesowanska jězba we wobłuku tuchwilneje wosebiteje wustajeńcy Serbskeho muzeja „Čej’ da sy?“. Drje na jednym z najhorcyšich dnjow lěta je so 13 zmužitych wobdźělnikow pod nawodom Tadeja Šimana­ na něšto wjace hač 20 kilometrow dołhu čaru po Njebjelčanskej, Ralbičanskej a zdźěla Chróšćanskej wosadźe na puć nastajiło. Na mnohich stacijach zhonichu zajimawosće wo pomnikach wěry, kotrež běchu do toho lědma wobkedźbowali.

Tak zhonichu w Njebjelčanskej cyrkwi wo mjeztym přemolowanych nasćěnowych wobrazach, kotrychž slědy pak su hišće widźeć. W Serbskich Pazlicach zastachu při hłownej dróze při swjatym křižu, kiž mnohim scyła wědomy njebě. A na kromje Wěteńcy pobychu při wosebje wupyšenym modlerskim stołpje. Wšudźe rozłoži Tadej Šiman stawizniske pozadki drohoćinkow. Při tym bě zajimawe zhonić, zo su křiže a stołpy často raz na hinašim městnje stali, hač hdźež je dźensa wuhladamy.