Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje ­čitarjam do domu noša. Najwjetši čas tuž našich pilnych roznošowarjow w lětnjej seriji předstajić (7).

Hdyž je rěč wo Kamjenej, wjesce wuchodnje Radworja, drje mysliš hnydom na mišterski zawod Rječka & Čornak, kotryž je daloko znaty za kompetentne poradźowanje a zatwar alternatiwnych tepjenjow. Mnozy pak tež wědźa, zo maš tam sedłarja Handrija Krala, kiž bě hižo mnohim prawa adresa, a to nic jenož křižerjam w jutrownym času. Z Kamjeneje, hdźež bydli něšto wjac hač sto ludźi, pochadźeja wuznamne wosobiny kaž 1921 tam rodźeny informatikar Mikławš Joachim Wićaz. Wón ma wulke zasłužby na polu numeriskeje matematiki a wunamaka prěni němski blidowy ličak. Wićaz bě spřećeleny z Konradom Zuse, kiž je hižo 1941 prěni kompjuter swěta natwarił. Tež serbski dźiwadźelnik Beno Šram, kiž je před sydom lětami 92lětny zemrěł, je so w Kamjenej narodźił.