Čorny Chołmc (SN/MWj). Runje hakle su so lětuše Krabatowe swjedźenske hry w Čornochołmčanskim Krabatowym młynje skónčili, to čaka tam na wopytowarjow dalši wjeršk lětušeje zarjadowanskeje protyki. Wot jutřišeho hač do 27. awgusta přeprošuja na kinowe předstajenja pod hołym njebjom. K zahajenju pokazaja jutře wuspěšnu produkciju z Tomom Hanksom „Ein Mann namens Otto“. Hanks hraje wobužneho wudowca Otta, kiž scyła přezjedny njeje, zo w susodstwje wjesoła a žiwa swójba zaćehnje.
Na cyłkownje 24 zarjadowanjach pokazaja wotměnjawy program, wobstejacy z blockbusterow a Disney-filmow. „Njebě lochko, z wulkeje ličby te filmy wupytać, kotrež měli na kóncu w programje filmowych nocow stać“, praji Matthias Pfitzner, kiž je sobu ideju filmowych nocow zrodźił. Wón je jednaćel firmy za logistiku zarjadowanjow a kulturnu gastronomiju PAN. „Smy filmy jara dołho wupytali, přetož poskitk nowych paskow bě tónraz jara wulki. Na kóncu mamy nětko program, kiž je dobra měšeńca filmow z Hollywooda, němskich produkcijow a dźěćacych filmow. Za kóždy słód je něšto pódla.“
