Budyšin (UM/SN). Z Mosta měra k Přibrjóžnemu pućej při Sprjewi wjeducy schód w Budyšinje dyrbi so nuznje ponowić. Tohodla su čłonojo měšćanskeje rady na swojim posedźenju do lětnjeje přestawki njeplanowane wudawki we wobjimje 182 000 eurow „za twarske ponowjenje a porjedźenje murje podłu schoda“ wobzamknyli.
Prěnje plany za to nastachu hižo w lěće 2019. Kaž z předłohi, kotruž je zarjad za wysoko- a hłubokotwar zestajił, wuchadźa, njemóžeše so město dołhi čas dojednać wo nakupje ležownosće, kotraž je za tute dźěła trěbna. Mjeztym tele dojednanje předleži.
Hižo w lěće 2017 běchu zwěsćili, zo je zepěranska murja podłu schoda w zdźěla jara špatnym stawje. „Dźěle murje z přirodnych kamjenjow su so hižo sypnyli, na wjacorych městnach kamjenje hižo hromadźe njedźerža, škałby su wupłokane, dale su widźeć brjuchi. Nimo toho rostliny muri přidatnje zeškodźeja“, zarjad za wysoko-a hłubokotwar w swojim posudku tehdy naliči. Njedostatkow drje mjeztym mjenje njeje.
