Wětrowske bydlenske domy skićeja zajimcam dobre wuměnjenja

Wětrow (UM/SN). Něhdźe 30 jednotliwych bydlenjow w bydlenskich blokach napřećo Wětrowskej šamotowni je tuchwilu prózdnych. To je něhdźe šesćina cyłkowneho wobstatka. To chce Bóščanski wjesnjanosta Stanisław Ryćer (Bóščanske rjemjesło) rady změnić. Wot toho časa zo je wón w lěće 2008 prěni raz jako wjesnjanosta nastupił, su Wětrowske bydlenske domy jedna z jeho najwažnišich komunalnopolitiskich temow. „Wětrowske sydlišćo scyła tak njeatraktiwne njeje“, wón měni. Wonkownje prezentuja so domy dosć nahladne, byrnjež raz trochu čerstweje barby trěbne było.