Wutwar spěšneje internetneje syće w Slepjanskej kónčinje dokónčeny

Mułkecy (AK/SN). W zarjadniskim zhromadźenstwje Slepo z komunami Slepo, Dźěwin a Trjebin ma nětko 1 500 domjacnosćow přizamk na modernu šěrokopasmowu škleńčnonićowu syć. Jeje wukon je hač do jednoho gigabita za spěšny internet. Runje tak su wjace hač 130 firmow, tři šule kaž tež pěstowarnje a institucije najnowši standard dóstali. „Z tym je so w Slepom něšto jako cyłk poradźiło. Nimale wšitcy wobydlerjo surfuja na gigabitowym niwowje. W Sakskej je jich přerěznje połsta procentow. Zasadźujemy so za skrućenje wjesneho ruma“, rjekny ministerski prezident Michael Kretschmer (CDU) wčera w gratowni Mułkečanskeje wohnjoweje wobory składnostnje symboliskeho starta giga­bitoweje syće w Slepjanskej kónčinje.