W Grodku maja wulki měšćanski swjedźeń z wobšěrnym programom
Grodk (JoS/SN). Wot jutřišeho hač do póndźele wotměje so w Grodku zaso wulki domizniski swjedźeń. Druhi kónc tydźenja w awgusće je za to hižo wjele lět kruty termin. Nimo toho je domizniski swjedźeń jedyn z najwobstajnišich zarjadowanjow regiona, tak zo tam lětsa znowa wjele wopytowarjow tež z druhich kónčin Łužicy wočakuja. Pjenježnje je swjedźenjowanje přez hospodarski plan města zaručene, ale tež mnozy sponsorojo, kiž najwšelakoriše zarjadowanja podpěruja, su hižo wjele lět wobdźěleni.
Hladajo na tři dny trajacy program orientuja so organizatorojo na wupruwowane městnosće zarjadowanjow. Cyłkownje je jich třinaće, z toho je wosom jewišćowych městnow. Wšudźe budu hudźbne poskitki přewahować. Tak wustupi na přikład njedźelu w 15.30 hodź. na torhošću před radnicu šlagrowy spěwar Gerd Christian. W popołdnišich, wječornych a nócnych hodźinach drje budźe zabawny park na Jurowej (Georgenstraße) wopytowarjow wosebje přićahować.
