Kulow (DH/SN). Njewšědny napohlad skićeše so sobotu wobydlerjam Kulowa, jako so dopołdnja črjódka kolesowarjow na tamnišim torhošću zetka. Woni podachu so na kolesowansku jězbu pod hesłom „Kołowokoło Kulowa“ přez katolsku Łužicu. Tadej Šiman, kotryž je dohromady štyri jězby jako přidatny poskitk k wosebitej wustajeńcy „Čej’ da sy?“ Serbskeho muzeja w Budyšinje koncipował, dohromady 22 kolesowarjow nawjedowaše.
Hišće na torhošću powita jězdźerjow farar Gabriš Nawka. We wosadnej farskej cyrkwi informowaštaj farar Nawka a Tadej Šiman wo historiskich a architektoniskich zajimawosćach gotisko-barokneho twara a Kulowskeje wosady. Z kolesom poda so skupina na to nimo stareje katolskeje Křižneje cyrkwje přez Nowu Wjes a nimo Zelderec hatow k wuhladnišću w Dubrjenskim bahnje. Tam rozprawješe biologa a ornitologa Syman Šołta z Budyšina wo florje a fawnje najwjetšeho přirodoškitneho pasma wuchodneje Němskeje. Tadej Šiman tón abo tamny historiski fakt wo bahnje a jeho wužiwanju doda.
