Budyšin (SN/pdź). Prawidłownje přiwabja Budyska Sundowner-bara wopytowarjow zbliska a zdaloka, kotřiž chcedźa sej z krasnym wuhladom napoj zesłodźeć dać. W minjenych tydźenjach wosta dešćikojteho wjedra dla tón abo tamny raz zawrjena. Ćim wjetše bě wjeselo, jako zašły pjatk něhdźe 150 hosći na zahrodu Serbskeho ludoweho ansambla přichwata.

Wječor bě wulkotny, kóžde městno wobsadźene a samo serbski kulturny program zaručeny. Muski kwartet PoŠtyrjoch zaspěwa připosłucharstwu někotre wrótne hrónčka. Po zwučenym wašnju mějachu wosebje štyrihłósne serbske spěwy na melodije znatych jendźelskich štučkow w repertoirje. Ludźo, kiž běchu ekstra na koncert přišli, mytowachu młodych muži runje tak z přikleskom kaž ći, kotřiž běchu připadnje na městnje. Publikum zwjeseli wosebje připowědź, zo zarjaduje skupina PoŠtyrjoch lětsa znowa adwentny beneficny koncert. Tón wotměje so 9. decembra w bróžni Floriana Rynča w Jaseńcy.