Hodźij (SN/MiR). Tuchwilu napadnu mjez Prěčecami a Haslowom wulke mašiny, kotrež napohlad krajiny změnja. Podłu Čornicy su zašłe tydźenje nasypali hromadu pjeršće. Po asfaltowej šćežce, kotraž nětko łuki dźěli, so wobydlerjo přechodźuja. Tež hdyž je ideja powabna, zo nastanje tam kolesowarska šćežka, koncentruje so wulkoprojekt na něšto tamne. Čornicy ma so jeje přirodny běh wróćić.
Zamołwitosć za naprawu ma awtodróhowa tzwr, kotraž z njej lětsa wot haperleje w nadawku zwjazkoweho zarjada za twar dróhow kompensuje. To rěka, zo wona z twarskimi naprawami wurunanja přesadźuje. Minjene dny běše na łuce w Haslowje hižo dosć derje spóznać, hdźe Čornica něhdy ćečeše. Wulki dešć a mokrota na łuce stej wobraz takrjec „molowałoj“. Tuž je něhdyši meandrowy puć rěčki spóznajomny. Twarsku naprawu planowachu hižo w lěće 1995 w zwisku z wutwarom awtodróhi A 4 mjez Wujězdom a wuchodnym Budyšinom. Zdobom su tehdy hižo dowolnosć za přerjadowanje wuprajili. Ćežišćo twarskich dźěłow měri so na renaturowanje wodźizny kaž tež saněrowanje łučiny Čornicy.
