Budyšin (SN). Syć za dźěćace a młodźinske dźěło spožči lětsa znowa myto za młodźinski angažement w Budyskim wokrjesu. Z mytom připóznawaja a hódnoća w zjawnosći wosebity angažement młodostnych. Ze spožčenjom myta pokazuje so na mnohotnosć, energiju a kreatiwitu młodostneho w čestnohamtskim dźěle a na słužbu za towaršnosć a w towaršnostnym žiwjenju. To móže wuwabić motiwaciju a być přikład za druhich, so aktiwnje a čestnohamtsce angažować.

Myto za młodźinski angažement spěchuje so z programa partnerstwa za demokratiju w Budyskim wokrjesu, wot Budyskeje nalutowarnje a Wuchodosakskeje nalutowarnje ze sydłom w Drježdźanach.