Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach ­čitarjam do domu noša. Najwjetši čas tuž našich pilnych roznošowarjow w lětnjej seriji předstajić (20/kónc).

Něhdźe na poł puću mjez Kamjencom a Budyšinom nańdźemy Łusč. Wjeska z něhdźe sto wobydlerjemi přisłuša wot lěta 1936 Bóščanskej gmejnje. We wosomdźesatych lětach 19. lětstotka naliči tam prof. Arnošt Muka 178 wobydlerjow. Z nich bě 165 Serbow. Mjeztym je so ličba wobydlerjow pomjeńšiła. Wjetšina Łušćanow su katolscy Serbja. Markantny twar je tamniši třiposchodowy hród, kiž bu kónc 18. lětstotka natwarjeny. Je wuhotowany z baroknej mansardowej třěchu. Nalěwo a naprawo stej přitwarjenej dwuposchodowej twaraj runja křidłomaj ze sedłojtymaj třěchomaj. Po sto lětach, kónc 19. lětstotka, bu hród něšto přetwarjeny. Wot lěta 1945 přetwarichu jón na wjaceswójbny dom. Jako tajki so dźensa hišće wužiwa.