Kajki je lětsa serbski podźěl na wjerškach w Serbach?

Budyšin (SN/MG). „Jednorěčnosć je lěkujomna“ – tole čitaš na nalěpku iniciatiwy Europskeje unije Language diversity. Hojenski srědk drje je, hdyž wotrosćeš z dwěmaj rěčomaj abo sej wjacore rěče přiswojiš. 38 procentow woprašowanych w mikrocensusu němskeho knježerstwa praji, zo doma wjace hač jednu rěč nałožuje. W serbskej Łužicy je dwurěčnosć w mnohich swójbach kaž tež w zjawnym rumje samozrozumliwa.

Jědźeš-li kedźbliwje po serbskich wsach, ći přeco zaso plakaty do wočow bija, kotrež na najwšelakoriše zarjadowanja wabja. Hač openair we Wotrowje, swjedźeń techno-hudźby w Smječkecach abo dumperowe mišterstwa w Hórkach – towarstwa a młodźinske kluby w Serbach so přeco jara wo to prócuja, zo wosebje w lěćnych měsacach zabawu ze zarjadowanjemi zaručeja.