„Serbsku rěč zdźeržeć“ běše tema fachoweje konferency we Wojerecach

Wojerecy (SN/MiP). Wjace hač štyrceći wobdźělnikow běše so pjatk dopołdnja we Wojerowskej starej radnicy na fachowu konferencu zešło, zo by wjace wo metodach a strategijach wožiwjenja kaž tež financielnych móžnosćach spěchowanja serbskeje rěče zhoniło. Wjetšina publikuma běchu zastupjerjo sakskich gmejnow a městow serbskeho sydlenskeho ruma. Ale tež sobudźěłaćerjo Domowiny, Zarjadniskeho zwjazka Při Klóšterskej wodźe abo Zwjazka za serbski kulturny turizm běchu přichwatali. Na zarjadowanje přeprosyłoj běštej społnomócnjenej za serbske naležnosće Budyskeho kaž tež Zhorjelskeho krajnoradneho zarjada, Halena Jancowa a Kati Struck. „Serbskosć w našim sydlenskim rumje njeměła ničo ekskluziwne, ale cyle wšědny wobstatk našeho žiwjenja być – wšako we njej korjenimy“, wuzběhny krajny rada Udo Wićaz (CDU) w swojej witanskej narěči hladajo na cile spěchowanja k zdźerženju a zachowanju serbskeje rěče. Podobnje so tež wšitcy dalši rěčnicy na tutym dnju wuprajichu.