Energijowy koncern z nowym rjadowanjom nastupajo wodu za zahrodki
Slepo/Trjebin (AK/SN). Wodu za krjepjenje zahrodkow w Slepjanskej a Trjebinskej gmejnje energijowy koncern LEAG wot lěta 2038 hižo njepodpěruje. Tole je Martin Klausch, pola LEAG zamołwity za infrastrukturu hórnistwa a za přesydlenje, wutoru na posedźenju Slepjanskeje gmejnskeje rady a nazajtra w Trjebinskej gmejnskej radźe připowědźił. „Wotpowědujemy nowym politiskim wusměrjenjam w Berlinje“, wón rjekny. „Zo bychmy so na brunicu koncentrowali, pruwujemy wšitke dobrowólne wukony. K tomu słuša tež woda za krjepjenje.“ Lěta 2008 bě Vattenfall tule podpěru zawjedł. Z njej chcychu wot brunicy bjezposrědnje potrjechenych hladajo na zniženy staw dnowneje wody podpěrać. Předewšěm Peter Mäkelburg, kiž bě wot 1982 hač do 2010 Trjebinski wjesnjanosta, je so za to zasadźał.
