Za wobydlerski forum z krajnym radu Udom Wićazom mało zajima było

Chrósćicy (SN/MWj). Mjeztym dźesaty wobydlerski forum je Budyskeho krajneho radu Uda Wićaza (CDU) a jeho nawjedowacych sobudźěłaćerjow minjeny štwórtk do Chróšćanskeje „Jednoty“ wjedł. Nimo nich bě dźewjeć wjesnjanostow přitomnych, zo móhli sobu na prašenja wotmołwjeć. Zajim wobydlerjow bě skerje snadny, přetož połojca stólcow wosta njewobsadźena. Za to bě paleta prašenjow a temow ćim pisaniša.

Tak chcyše Křesćan Gruhn z Konjec wědźeć, kak móhł wokrjes k tomu přinošować, zo njebychu na ratarskich płoninach žane fotowoltaikowe připrawy nastali. Tomu móže wokrjes lědma zadźěwać, dokelž njemóže wobsedźerjej předpisać, kak ma swoje płoniny wužiwać, Wićaz rjekny. Zajimawe běchu w tym zwisku jeho informacije wo tym, zo planuje wokrjes na parkowanišću Kamjenskeje wotnožki krajnoradneho zarjada fotowoltaisku připrawu, pod kotrejž móhli awta dale parkować. Tak bychu płoninu wužiwali, kotraž je tak a tak hižo zazyglowana.