Chrósćicy (JK/SN). Lětuši hospodarski plan Chróšćanskeje gmejny budźe kónc lěta po słowach wjesnjanosty Marka Klimana (CDU) wurunany a w tajkim stawje, kaž bě předwidźane. To ­wobkrući na minjenym posedźenju gmejnskeje rady tež Michaela Jurkowa, naslědnica wjelelětneje zamołwiteje komornicy gmejny Franciski Čapikoweje, kotraž so tuchwilnje na zarjedźe zarjadniskeho zwjazka do swojeho noweho zastojnstwa krok po kroku zadźěła. Gmejnje drje hišće wšitke zličbowanki za wobšěrne wobnowjenje Chróšćanskeje nawsy a ­Cyrkwinskeje hory njepředleža, ale te njebudu so negatiwnje na bilancu gmejny wuskutkować. Mjeztym je tež modlerski stołp na cyrkwinskej horje wobnowjeny, štož je gmejnu 7 500 eurow płaćiło. Z tym je ­cyły teren wokoło nawsy a hory w jara přijomnym a spodobnym stawje.