Čorny Chołmc (SN/MiR). Młodźinski orchester Sunshine zakónči wčera nawječor lětuši swjedźeń domchowanki w Čornochołmčanskim Krabatowym młynje. Hudźbnicy z Wojerec a wokoliny zahorichu z mjezynarodnje woblubowanymi hitami. Katka Pöpelec wodźeše po programje Smjerdźečanskeje rejowanskeje skupiny. Wona přeradźi přihladowarjam, kotřiž běchu telko, zo na ławkach před jewišćom hižo městna njemějachu, zo njebě mjez susodnymaj wsomaj Konjecy a Šunow přeco měrliwje było. Dale je wona wšelake drasty, kotrež běchu rejwarki zwoblěkane, rozłožowała. Najwjetši přiklesk žnějachu hólcy z Pastyrskej reju. Runje tak młodźi su rejowarki skupiny JUTA z Brětnje. Holcy wupytaja sej načasnu hudźbu po swojim słodźe a tworja na nju sami choreografije, kotrež zjawnje předstaja. Čłonojo Rakečanskich muzikantow podachu z čěskimi, serbskimi a němskimi dujerskimi štučkami zabawny zazběh do njedźelnišeho swjatka, kotryž bjezdwěla wo wjele wjace hač tysac zajimcow za wopyt wužiwaše. Sobotu připołdnju je skupina „Horjany“ do rejki přeprosyła.