Wokrjes widźi po seriji nadpadow wjelkow „njeznjesliwu“ situaciju
Budyšin (SN/mb). Rozestajenje wo wjelki we Łužicy je so dale přiwótřiło. Wčera je krajnoradny zarjad aktualnu bilancu nadpadow rubježneho zwěrjeća jeničce w nocy na srjedu wozjewił. W Kózłach (gmejna Budestecy) stej subožnej (trächtig) wowcy z woporom wjelka byłoj. Pola plahowarja w Šumbarku (Schönberg), wjesce gmejny Kumwałd, běchu kozy a dwě wowcy potrjechene, mjez nimaj boran za plahowanje. Dalši nadpad su z Łuska (wjesny dźěl města Wóspork) přizjewili: Tule je wjelk něhdźe dwaceći wowcow morił.
