Delnja Hórka běše za čas Martina ­Luthera samostatna wjes. A hórku ­njedaloko wsy mějachu domoródni za swoju „domjacu“. Wjes blisko Budyšina njepřisłušeše tehdy tež hišće gmejnje Malešecy. Dźensa je wona do teritorija Budyskeho spjateho jězora zapřijata a přisłuša tuž městu Budyšinej.

Delnja Hórka (WL/SN). Před mjeztym 140 lětami, na česć 400. narodnin reformatora bě so česćowar Luthera, Delnjohórčanski wyši wučer Sperling, za twar pomnika reformatorej na bliskej hórce zasadźił, a wobydlerstwo ideju witaše. 10. nowembra 1883 bu połdra metra wysoki pomnik poswjećeny. Praworóžkata, k njebju wupřestrěwaca a lochce zwusčaca so stela steji na třoch schodźenkach a je w serbskej rěči popisana. Tam spominaja na dr. Martina Luthera a na to, zo je twjerdźizna Bóh a zo su Delnjohórčenjo pomnik k Božej česći stajili. Napis je blidarski mišter Bohuwěr Krjeńc zhotowił. Tež kamjentna ławka ma serbskorěčny napis, kiž na krasnosć Božeje stwórby pokazuje a wopytowarjow pohnuwa so po njej rozhladować. Cyłotne kóšty pomnika, wopřijace swjatočnosć, wučinjachu swój čas 230,38 hriwnow.