Serbska swójba so prěni raz na wubranju žrěbcow wobdźěliła
Krumke (MG/SN). Hdyž zetka so prominenca plahowanja ćežkich koni w saksko-anhaltskej wjesce Krumke, potom je kóždolětne wubranje (Körung) najlěpšich žrěbcow zymnokrejnych koni na rjedźe. Lětsa poda so prěni raz tež serbska swójba Gruberec z Worklec ze swojim dwaj a poł lětnym konjom na wurisanje.
Hačrunjež so zarjadowanje hakle sobotu wotměło, podachu so swójbni hižo pjatk na poměrnje daloki puć. Něhdźe pjeć hodźinow wšak běchu z awtom po puću. Jako dojědźechu sej do jěchanskeho areala, běše tam hižo nadosć konkurency. Dohromady 19 žrěbcow ze šěsć zwjazkowych krajow běchu na wubranje přiwjezli. Egon, kaž rěka kóń Gruberec swójby, bě při tym jenički ze Sakskeje.
