Wědu wo Serbach sej přiswojić a serbsce nawuknyć je digitalnje móžno

Slepo (AK/SN). W Slepjanskim kulturnym centrumje je Juliana Kaulfürstowa zajimcam wo serbskim digitalnym swěće přednošowała Motiwatorka za serbsku rěč w Slepom a Hochozy, skutkowaca w Syći za regionalnu identitu a serbsku rěč (ZARI), rjekny. „Serbski digitalny swět w interneće so stajnje dale wuwiwa. Wona přinošuje wožiwjenju serbskeje rěče a ju podpěruje. Wo tym sym přeswědčena.“ W běhu swojeho přednoška je wulku ličbu linkow na serbskorěčne strony kaž tež dalše poskitki w syći předstajiła. To nastupa wobłuki kaž wuknjenje a přełožowanje, medije, medijowe kubłanje, kultura, zarjadowansku protyku, cyrkej, towarstwa, kreatiwne hospodarstwo a nowu hudźbu. Tajke poskitki zajimcam wuknjenje serbšćiny wolóžeja. Nimo toho zbližeja jim kulturu Serbow a poskićuja móžnosće nowe kontakty nawjazać. Maćeršćinarjo namakaja lóšo přistup k swójskej kulturje. Pohibowanje w syći je z pomocu mnohich stronow w maćeršćinje jednoriše a fokusěruje mysle.