Chrósćicy (jb/SN). Serbska kapała Holaski, ke kotrejž słušeja Donatec bratřa Tadej, Bosćan, Michał a Józef z Chrósćic kaž tež Kito Mark z Noweho Łusča su w minjenym času na mnoho zarjadowanjach koncertowali a publikum zahorili. Zdobom skedźbnichu na so, jako wozjewichu tři nowe spěwy, kotrež běchu w Lipsku produkowali. Nětko pak móža swojich muskich a žónskich přiwisnikow z cyle nowej akciju zwjeselić a su za tutu hižo w socialnych syćach wabili. „Poskićamy wotnětka tež wosebite produkty našeje band. Su to pulowry, T-shirty a čapki, a to we wšelakich wulkosćach a barbach, za dźěći, žony a muži“, rozprawja čłon Holaskow Józef Donat.