Budyšin (CS/SN). Wosebitu překwapjenku wobradźichu čłonojo Budyskeje powołanskeje wohnjoweje wobory na wčerawšim dnju swj. Mikławša dźěćom, kotrež dyrbja w adwenće w chorowni přebywać. Čłonaj skupiny za wuchowanje z wysokosće Sylvio Bolz jako Mikławš a Hendrik Schütze jako jandźel krosnowaštaj z powjazom z třěchi kliniki.
Při sebi měještaj ćežkej měchaj. W jednym běchu dary za cyłu dźěćacu staciju, mjenujcy Ochranowsku hwězdu, pjeć CD-playerow z cejdejkami a dwójce twarske klocki. W tamnym měše běchu dariki za kóžde jednotliwe dźěćo. Jako prěni smědźeše sydomlětny Maximilian swój dar přijimać. Wón njetrjeba we łožu wostać a móžeše cyłu akciju z balkona dźěćaceje stacije wobkedźbować. To samsne činjachu někotři sobudźěłaćerjo stacije. Runje jako dariki přepodachu, dyrbjachu někotři z wohnjowych wobornikow, kotřiž běchu Mikławša a jandźela přewodźeli, spěšnje wotjěć, přetož jich wołachu ke chutnemu zasadźenju. Dary přewostajili su dwě wulkej Budyskej kupnicy kaž tež firmje Plastic Konzept z Nowosólca a Ochranowske hwězdy zhotowjacy zawod.
