Slepo (AK/SN). Swobodny stat Sakska zapłaći w dalokej měrje přidatne wudawki za nowu Slepjansku wohnjowobornu gratownju a za nowotwar Rownjanskeje pěstowarnje „Milenka“. „Tele dny smy zdźělenku wo spěchowanju dóstali“, praji Slepjanski wjesnjanosta Jörg Funda (CDU). Gratownja płaći dohromady 3,4 miliony eurow. Z toho přewza Sakska 3,057 milionow eurow, gmejna financuje 343 000 eurow. Jeničce ze swójskich ­srědkow gmejny njebychu twar zapłaćić móhli. Projekt je mjeztym 740 000 eurow dróši hač spočatnje w lěće 2019 planowany. Přičiny su inflacija a podróšene kóšty w twarskim wobłuku. Lětsa dyrbjachu samo twarske dźěła nachwilnje přetor­hnyć, dokelž běchu spěchowanske srědki z prěnjeho přizwolenja přetrjebane.