W Konjecach lětsa znowa na podawk lantaga zhladowali
Konjecy (SN/AN). Hižo z časa přewróta haja pola Čornakec-Nowakec w Konjecach kóžde lěto 2. januara tradiciju lantaga. Spominaja při tym na dźěławych w ratarstwje, kaž su to pohončojo, čeladni, dźowki, wotročcy abo pěstońče, kotřiž wot jednoho burskeho statoka k druhemu na słužbu ćehnjechu.
Hač do 19. lětstotka hišće wotměwaše so tutón „přećah“ w Sakskej na dnju swjateje Wałpory, 1. meje, abo na dnju swjateho Michała, 29. septembra. Knježkojo a čeladni wotzamknychu dźěłowe zrěčenje jeničce ze zawdaćom ruki. Lětnju mzdu dóstachu přistajeni na kóncu słužbneho lěta. Nimo pjenjez běchu pak tež naturalije a surowizny, črije, drasty abo płaty wobstatk mzdy.
Čeladni, posoljo, wotročkojo abo dźowki pochadźachu w starym času z kóždeje woršty towaršnosće. Čeledź na wsy na přikład pochadźeše zwjetša z małoburskich swójbow a běše fleksibelny instrument k zaručenju přidatnych dźěłowych mocow.
