Na gmejnskim zarjadnistwje w Hamorje maja nětko solarnu připrawu. Tohodla chce gmejna elektroawto kupić. Nimo toho saněruja tam fasadu a zatwarja lift.

Hamor (CK/SN). Wonkowne sćěny Hamorskeho gmejnskeho zarjadnistwa da komuna tuchwilu saněrować. Hižo w septembru 2023 běchu gmejnscy radźićeljo jednohłósnje rozsudźili, na třěše fotowoltaikowu připrawu z bateriju instalować. Nadawk we wobjimje 66 500 eurow přepodachu firmje z Delnjeho Wujězda. Spódnju konstrukciju su hišće w starym lěće dozhotowili. Mjeztym su tež solarne module připrawjene. Nětko chcedźa hišće bateriju instalować dać. Předwidźane tohorunja je, nabiwansku staciju za elektroawta natwarić.