Inwesticije w lěće 2024 w Rakečanskej gmejnje su hižo dlěje planowane. Za nje trjebaja tójšto swójskich srědkow. Te drje maja k dispoziciji, su pak tež rizika, kotrež gmejna wobwliwować njemóže.
Rakecy (UM/SN). Za lěto 2024 Rakečanska gmejna wjacore naročne projekty planuje. Po wjacore lěta trajacych přihotach chcedźa je nětko skónčnje zwoprawdźić. Na prěnim městnje mjenuje wjesnjanosta Swen Nowotny (CDU) energetiske saněrowanje zakładneje šule. Nimo toho chcedźa kubłanišćo tak wuhotować, zo je wone bjez zadźěwkow přistupne. Za to chcedźa tam lift přitwarić. Poprawom bě tónle projekt hižo za lěto 2023 planowany. „Nadźijomnje dóstanjemy tak spěšnje kaž móžno připrajenje za spěchowanske srědki, tak zo móžemy lětsa twarić započeć“, praji Rakečanski wjesnjanosta. Nic mjenje wažny je twar gratownje za dobrowólnu wohnjowu woboru w Stróži. „Wšitko pak wotwisuje wo toho, hač nam spěchowanske srědki přizwola“, Swen Nowotny podšmórnje.
