Ćisk (JT/SN). Wot lěta 2006 organizuje Ćišćanska­ serbska rejowanska skupina kóžde druhe lěto drastowy bal pod hesłom „Rejowanje zwjazuje“. Minjenu sobotu zaso tak daloko bě. Gabriela Linakowa witaše něhdźe 140 wopytowarjow na mjeztym 9. Ćišćanski drastowy bal na žurli hosćenca „K zelenemu wěncej“. Wona so dopomina: „W lěće 2006 běchmy my Ćiskowčenjo nimale sami na napoł pjelnjenej žurli“. Mjez lětušimi hosćimi běštaj Wojerowski měšćanosta Mirko Pink z mandźelskej Mariju a wjesny předstejićer Jens Zahrodnik. Rady witachu znajerja serbskeje narodneje drasty Güntera Hoffmanna ze Spal, wjelelětnu choreografowku Helgu Hansch a regionalnu rěčnicu Birgit Hančikowu.

Prjedy hač dujerska kapała z Wjelceja k rejam zahra, so wšitcy hosćo w narodnej drasće a jich partnerojo před zachodom k zaćahej a k polonezy zestupachu. To bě wulke wužadanje, kotrež pak wšitkim wobdźělnikam wočiwidnje wjeselo wobradźeše.