Radźićeljo koncept pućowanskich a kolesowanskich šćežkow schwalili

Kulow (AK/SN). Město Kulow prócuje so wo zwisk za kolesowarjow ze susodnej Rakečanskej gmejnu. Kolesowanska šćežka ma wot Kulowa přez Hózk, Rachlow a Komorow hač do Rakec wjesć. Tónle cil podšmórny měšćanosta Markus Posch (CDU) srjedu na posedźenju Kulowskeje měšćanskeje rady. Jeje čłonojo wobzamknychu jednohłósnje koncept kolesowanskich a pućowanskich šćežkow Hornjołužiskeje hole a hatow 2024.

Koncept nasta wot 2021 hač do 2023 w režiji regionalneho managementa Hornjołužiskeje hole a hatow. W nim zapřijatej stej prěni raz nimale dospołny wobstatk kolesowanskich a pućowanskich šćežkow a k tomu słušaca infrastruktura za wšitkich 15 komunow, kotrež Leaderowej spěchowanskej kónčnje přisłušeja. Na zakładźe wuslědka analyzy zestajichu za cyły region přehlad, hdźe móhli dalše šćežki nastać. Hižo wobstejace koncepty při tym wobkedźbowachu. Nětko wobzamknjeny koncept dotalne wudospołnja.