Zaso na 581 metrow wysoku Wjelču horu w Čěskej pućować

Wjelča hora (ES/SN). Před něšto wjace hač dobrym lětom, dokładnje 4. apryla 2023, su w nócnych hodźinach wokoło napoł štyrjoch na wsach wokoło Wjelčeje hory (Vlči Hory/Wolfsberg) mjez Rumburkom a Šumporom (Krasna lipa) sireny rželi. Sapace płomjenja so palaceje bawdy na tamnišej Wjelčej horje běchu w nocy daloko do kraja widźeć. Dźakowano spěšnemu jednanju wohnjowych woborow z wokolnych wsow, bu 16 metrow wysoka wuhladna wěža zachowana – byrnjež ćežko wobškodźena była. Bawda w bjezposrědnjej bliskosći bu, runje tak kaž z wěžu zwjazany twar, dospołnje zničena. Wšitko so w płomjenjach sypny. Štóž horu a ležownosć znaje, wě sej předstajić, kak spomóžny wukon wohnjowych wobornikow to běše, w nocy wodu k hašenju w najkrótšim času na horu dóstać. Njeje předołho trało a wopytowarjo móžachu wěžu zaso wopytać. Zamołwići su ju tak ponowili, zo běše přistup wěsty. A wopytowarjo zapłaćichu za to zastupny pjenjez.