Slepo (AK/SN). Štóž chce w Slepom wot ćaha do busa abo nawopak přestupić, móže to nětko wěsćišo a njekomplikowanišo činić. Minjeny štwórtk přepodachu tam małe nowe busowe dwórnišćo při přichodnym lěkarskim domje. Krajny zarjad za dróhotwar a wobchad, ZVON a Slepjanska gmejna inwestowachu dohromady 620 000 eurow.
Nimo městnow za busy nasta 16 parkowanskich městnow za awta, dwě dalšej za awta zbrašenych, stejaki za kolesa kaž tež ławki. Z busoweho dwórnišća wotjědu tři busowe čary. Při nabiwanskej staciji móžetej dwě elektroawće naraz milinu tankować. „Z busowym dwórnišćom mamy nětko porjadne a přewidne wobchadne wjedźenje“, praji Slepjanski wjesnjanosta Jörg Funda (CDU). Bjez zadźěwkow móža tež ći do busa zalězć, kotřiž maja dźěćacy wozyčk abo kotřiž su na chorobny stoł pokazani. Šoferojo busow móža swoje jězdźidło wěsće parkować a nuzniki w přichodnym lěkarskim domje wužiwać. „Poradźiło so je, městno žiwe a přewidne wuhotować“, rjekny jednaćel ZVON Christoph Mehnert.
