Lěsk (JoS/SN). Z mnohimi hosćimi su minjeny kónc tydźenja w Lěsku (Lieskau) pola Grodka 550. róčnicu prěnjeho pisomneho naspomnjenja swjećili. Wobšěrny dwudnjowski program wobsahowaše tohorunja serbske stawizny wsy, kotraž dźensa městu Grodkej přisłuša. Wosebity powabk na swjedźenišću bě historiske wohnjowoborne jězdźidło z dołhim rěblom, na kotrehož wjeršku běchu wótřerěčaki přičinjene. Mjez druhim witachu Grodkowsku wyšu měšćanostku Christine Herntier a delegaciju z Liškowa pola Finsterwaldy, ke kotremuž wudźeržuja přećelske styki.

Přijěli su sobotu wobdźělnicy zetkanja mopedow SR 2 ze susodneho Slepoho. Šoferojo wobdźělichu so na zabawnych wubědźowanjach z piwowymi karanami. Woblubowane běchu tež jězby z konjacym zapřahom po wsy a po susodnym parku. Najwšelakoriše stawizniske informacije sposrědkowachu při tym čłonojo dźěłoweho zjednoćenstwa za chroniku. Woni běchu z akribiskim dźěłom wustajeńcu wo Lěsku zestajili. Překwapjenka běše pohladnica składnostnje jubileja, kotruž je Grodkowski grafikar Norbert Anspach naćisnył.