Pěstowarnja „Milenka“ w Rownom ma kónc lěta hotowa być

Slepo (AK/SN). Dźěło na narunanskim twarjenju za Witaj-pěstowarnju „Milenka“ w Rownom, kotrejež nošerka je Slepjanska gmejna, dale postupuje. Tole podšmórny Steffen Seidlich, nawoda zarjada za planowanje, twarstwo a hórnistwo w zarjadniskim zwjazku Slepo, zašłu wutoru na posedźenju gmejnskeje rady. Radźićeljo su trěbne dalše nadawki z cyłkownej sumu něhdźe 564 000 eurow jednohłósnje wobzamknyli. Wonkowne připrawy ma předewzaće Garten Eden Dirk Noack z Brězowki w gmejnje Dźěwin wuhotować. Brutto-suma tutoho nadawka wučinja 406 000 euro. Z tym je so gmejnska rada za hospodarsce najbóle přihódneho poskićowarja rozsudźiła. Poskitk bě wo 46 000 eurow niši, hač spočatnje planowana suma architekta. Dalše předewzaća přewozmu blidarske, molerske a lakěrowanske dźěła. Gmejnska rada je wjesnjanosće Jörgej Fundźe (CDU) nadawk dała, za dalše losy stajnje hospodarsce najbóle přihódneho poskićerja wubrać. Z tym, tak běchu sej woni přezjedni, tež čas lutuja. Hewak bychu hakle w awgusće rozsudźić móhli.